قواعد الميكروباص الثلاثون

1-متركبش ورا السواق عشان هتلبس في لم الاجره.
2-السواق مش هيوطي الكاسيت .. اجل مكالماتك لحد ما تنزل.
3-متوقفش قبل تحويده عشان لو الميكروباص وقفلك الناس اللي وراه مش هتسيبه في حاله عشان قافل عليهم الطريق.
4-الاربعه اللي على الكنبه الواحده لازم يقعدوا بالشكل ده • ° • °
5-جهز اجرتك من قبل ما تركب.
6-سيجاره السواق دي من المقدسات .. ماينفعش تقوله يطفيها.
7-ابقى قوله على المكان اللي انت نازله قبلها بشارعين على الاقل.
8-وافق السواق في اي موضوع هو بيتكلم فيه عشان متدخلش في حوارات مالهاش لازمه .. السواق دايماً على حق.
9-الكرسي اللي جنب السواق ده للمزز بس .. ماتفكرش تركب فيه عشان تبقى ضيف لطيف.
10-ذوق سواق الميكروباص في اختيار الاغاني و الدباديب اللي في العربيه دي حاجه مبنيه على جرح قديم و مش قادر ينساه و مش موضوع للمناقشه.
11-عينك على جيبك طول الرحله تجنباً للسرقات
12-ربطات الحجاب العجيبه بتاعه البنات ممكن تضايقك و انت قاعد .. حاول تجنبها بهدوء.
13-لازم يكون معاك كمامه صغيره .. هتشكرني بعدين على الفكره دي
14-دايماً هتلاقي واحد بيفاصل في الاجره مع السواق .. ده وحش سيبك منه.
15-المكتوب على ضهر الميكروباص دي حكمه مش حاجه بتضحك.
16-صور الطفل اللي هتلاقيها ده غالباً ابن السواق او ابن اخته.
17-اللي نازل الاول بيركب بره.
18-انت متحرش في نظر اي بنت حتى لو لابس بدله .. خليك عينك على جيبك زي ما قولنا عشان في بنات ما بتصدق يلاقوا حد بيبصلهم.
19-في الميكروباص انت مسير مش مخير.
20-كونك انك تمد ايدك للميكروباص اللي جنبك عشان تجيب منه فكه للسواق ده واجبك و انت مش بتخاطر بحياتك ولا حاجه.
21-متفكرش تبتسم .. انت في ميكروباص و مفيش اي حاجه تدعو للابتسام.
22-متطلعش موبايلك جوه الميكروباص عشان بيبقى ملكيه عامه و بيبقى على الاقل 4 مركزين في ال News Feed بتاعه فيسبوكك مش انت لوحدك.
23-الكلاكس بتاع السواق ده مش لتنبيه السواقين اللي حواليه .. ده بيت مع الاغنيه اللي هو مشغلها.
24-الميكروباص مش بتاع حارات .. بتاع غرز.
25-كوبايه الشاي الفاضيه جنب السواق دي تقريباً الميكروباص بينزل بيها .. زي برضه الراجل التخين ابو شنب اللي دايماً تلاقيه جنب الازاز و على رقبته فتافيت مناديل.
26-لو قاعد جنب الباب هتلبس في فتحه و قفله لباقي الركاب اللي داخلين و خارجين.
27-قواعد المرور بالنسبه للسواق دي مجرد ارشادات و تسقط منها صفة الالزاميه.
28-لو لقيت السواق مشغل اغاني اجنبي اعرف انك مخطوف.
29-و اخيراً .. السواق مش بيقف .. الميكروباص بيفضل ماشي و لما سيادتك تيجي تنزل بيهدي بس .. و انت و لياقتك بقي.
30- اكتبها انت من خبرتك